Connectez-vous S'inscrire
TapTapMag.com

RIP Black Alex: Klibr 703 Réagit


Notez
13 Novembre 2015



RIP Black Alex: Klibr 703 Réagit

TOUT MIZISYEN TE KA BLACK ALEX.

Nou konnen mpa moun ki renmen ni souse ni grate siksè sou do moun ak evenman kap fè la "une", men mkonn pale dè fwa lè msantil nesesè.

Map swiv ak atansyon, atansyon yo bay depa Black Alex depim maten. Men se pa Black la non ki jwenn atansyon an, e mwen reflechi sou poukisa...
Mwen wè gen moun ki mete kalifikatif "genie" "legend" devan non defen an, premyèman se swa ke moun sa yo mechan, oubyen yo sòt anpil, ou san respè pou de moun ki ka gen tit saa. Men se pa laa pwoblèm nan ye dayè mkonnenw pap dakò avèm tou ou menm kap li a.

Ann gad bagay la sou on lòt ang, si Black la te on "genie" vre, ebyen se konsa nou trete "genie" nou yo? Kyèt sosyete saa gen pwoblèm bre mesye. 
Mwen mpanse se te on ti vagabon menm jan avèm ak kèk lòt jenn gason ki pa gen anyen pou fè ki vin echwe nan mizik rap wi... kyèt map di tenten laa, 
Banm reflechi!

Anh! Black Alex mouri vre, apre tout sinyal la voye bay pou di ke l pa anfòm li pa byen, bay fanatik li ak moun ki te konn fè kòb ak talanl. Heheyyyy!!!

Oo bon apa se nan on lopital kominotè li mouri, sa vle di atis la pat gen kòb. Mmm!!! Mezanmi sa di.

Poutan apre lanmò a se te on genie wi, on legend de la musique Haitienne.
Aaaaaaaaaaay fout! Banm tèt mwen bann lanmerd!!!

Al fonw ti ransenye nou sou Dieudonné Larose, lil vivan toujou li nan blok kafou. Sonje sal te fè nan mizik ayisyèn nan ane 90 yo e gad jan lap viv.

Al ransenye nou sou Yole Derose ki poukont li sonw icone men sonje maril ki te yon patrimoine
Nan panteon mizikal ayisyen an. Li gonw cancer se kèt yap fè pou li poul al pwan swen. San konte yo fonw leve de fon sou nonl deja yo pa remèt li on goud apre rekòlt la.

Al ransenye nou sou Herold Christophe sal te fè janl te konn chate. Ki jan ki bò li mouri e kòman yo fè pou anterel.
Poum site ke sa yo sèlman

Atis yo fèn kwè yo se sipèsta yap byen viv. Yo kwè anpil nan aparans ak blòf, men se pa fòt yo paske si yo pa diferan de nou menm ki fanatik nap trip sou yo nou pap ba yo respè, nap di yo pa reyisi se tan yap pèdi. 
Atis yo oblije ap pèfòme on vi ki pa reyèl toutan.
Anpil nan yo gen gwo problèm kòb, pwoblèm grangou, ak anpil lòt pwoblèm ekonomik ou finansye.
Men yo pa ka di sa pou yo fè hit hahahahaha!!!

Kom si atis la se yon espri ki nouri de respè ak glwa fanatik ka ba li "amènnnnn"
Mrenmen lè zanmi an wèm li dim "atis mpoko gen dènye prodwiw la non. fèm kado on cd", kòm si sim te Ingenieur li tap dim fèl kado on plan kay.

Kòman nou vle montre "genie" atis nou yo lanmou ak ankourajman lè:
Media pa vann nou mizik lokal, nou pa ht cd orijinal, nou pa al nan pwogram atis yo swa a koz de pwoblèm kòb oubyen ensekirite ekstera, sponsor pap sibvansyone yo sof nan kanaval, men Martelly sot chanje done yo pandan 4 lane.
Labank pa ba yo kredi sou baz ke yo se atis.
Mizik pa konsidere kòm on metye nan peyi a.

Sa fè lontan gen anpil atis nou wè kap byen mennen (alò nou panse kap byen mennen) se youn ou plizyè fanm "groopy" nan Miami ou byen New York kap jere atis la pou postè flannè ak popilè. Alòs yo prefere al pase mizè a lòt bò, lwen je nou. (Mkwaze yo Miami ki pwal nan plàn menm jan avèm)

Kounyaa si yo pa jwenn fonw spòt pub pou on kaka aran pou on kliyan ki pwal fè milyon, yo oblije ret tann chak lè gen eleksyon pou fè jako pye vèt ak sousou dèyè on kandida.

An! Atis nou yo se genie epi yo paka viv on fason desan ak zèv yo.

Atis ki entelijan kounyaa ou pa wè nan kisa yo envesti. "La politique est une entreprise plus que rentable chèr ami"

Atis ayisyen fè travay anbasadè nou yo poko janm fè ki se pote imaj pozitif peyi dayiti al byen lwen nan lemond.
Men nou peye yo ak R.I.P ak bèl propo elojye lè yo mouri.

Respè pou nou mesye mizisyen frèm yo paske ngen kouraj pou nap kontinye pwodwi nan on
Sosyete enfeste ak ipokrit, mantè, profitè, sousou, trèt, ki pa konn valè tèt yo ke nan eksplwa istorik 1804 la ki malerezman rekipere e re ekri pa pitit 1500 piten Bertrand D'Orgeron te fè vin peple pati oksidantal ti bout zile saa

Menm si Black Alex pat byen jere ti kòb li te fè a (paskel te fè kanmenm), menm si li te pwan nan tronpans rezo gwo sipèsta ki te bal rèv ak ilizyon. Menm si li pat konn li poul te wè ke lap touye tèt li nan pwan dwòg. Men tout moun ki te eksplwate l on jou ou on lòt ap gonw responsabilite devan je listwa.

Mpat on fan Black Alex, men mvoye senpati mwen bay fanmil zanmil e tout moun ki afekte ak dèy saa.



AUSSI Sur TapTap Magazine
< >

Vendredi 9 Décembre 2016 - 13:04 Mort de Samba Kessy : Réaction de Fred Hype

Vendredi 9 Décembre 2016 - 11:56 Samba Kessy aka King Kessy de Koudjay est mort


Publicité







Facebook

Publicité